DALAWANG dating aide ni Vice President Sara Duterte na humawak sa P612.5 milyong confidential funds ang inaasahang haharap bilang mga susunod na testigo sa impeachment trial sa Senado sa susunod na linggo.
Kinumpirma ni lead prosecutor at Batangas Rep. Gerville “Jinky Bitrics” Luistro na kabilang sa mga susunod na haharap sina Gina Acosta, dating special disbursing officer ng Office of the Vice President (OVP), at Edward Fajarda, dating special disbursing officer ng Department of Education (DepEd).
Bago ang pag-adjourn ng pagdinig noong Miyerkules, iniutos ni Senate impeachment court Presiding Officer Sen. Francis “Chiz” Escudero ang pag-isyu ng subpoenas ad testificandum at, kung kinakailangan, subpoenas duces tecum laban kina Acosta at Fajarda upang matiyak ang kanilang pagdalo at pagdadala ng mga kaugnay na dokumento.
Nagpalabas din ng subpoena ang korte para kina Commission on Audit (COA) Intelligence and Confidential Funds Audit Office Supervising Auditor Celine May Del Campo at House Legislative Information Resources Management Department Director Marivic Pareja. Inaasahang magpapatuloy si Del Campo sa kanyang testimonya sa muling pagbubukas ng paglilitis sa susunod na linggo.
Ang sentro ng imbestigasyon ay ang P612.5 milyong confidential funds na binubuo ng P500 milyon para sa OVP mula ikaapat na quarter ng 2022 hanggang unang tatlong quarter ng 2023, at P112.5 milyon para sa DepEd sa unang tatlong quarter ng 2023 habang kalihim pa ng edukasyon si Duterte.
Sa naunang pagdinig, tumestigo si dating LandBank department manager Violeta Constantino na si Acosta ang nag-encash ng apat na Treasury checks na tig-P125 milyon o kabuuang P500 milyon para sa OVP noong Disyembre 2022, Pebrero 2023, Abril 2023 at Hulyo 2023.
Samantala, sinabi ni dating LandBank department manager Nenita Camposano na si Fajarda naman ang nag-encash ng tatlong Treasury checks na tig-P37.5 milyon o kabuuang P112.5 milyon para sa DepEd noong Pebrero, Abril at Hulyo 2023.
Nauna ring kinilala ni COA state auditor Roderick Wamil sina Acosta at Fajarda bilang mga special disbursing officer na tumanggap ng confidential funds at nagsumite ng liquidation documents para sa kani-kanilang tanggapan.
About the Author
