TIKLO ang limang indibidwal, kabilang ang isang 19-anyos na construction worker at isang umano’y repeat drug offender, matapos salakayin at buwagin ng mga awtoridad ang isang hinihinalang drug den sa isinagawang buy-bust operation sa Talisay City, Cebu, noong Sabado, Nobyembre 21, 2026.
Isinagawa ang operasyon dakong alas-12:24 ng tanghali sa Purok Sambag, Barangay San Roque ng mga operatiba ng Philippine Drug Enforcement Agency (PDEA) Region 7 at mga tauhan ng Talisay City Police Office.
Kinilala ni PDEA 7 Regional Director Joel B. Plaza ang pangunahing target ng operasyon at umano’y nagpapatakbo ng drug den na si alyas “Alex,” 23-anyos at kasama ang kasabwat nitong si alyas “Peter,” 32-anyos na e-bike driver.
Dinakip din sa loob ng lugar ang tatlong hinihinalang parokyano ng drug den na sina alyas “Ged,” 27-anyos na e-bike driver; alyas “Al,” 41-anyos na manggagawa; at alyas “Jay,” 19-anyos na manggagawa.
Pawang residente ng Barangay San Roque ang limang suspek.
Tip mula sa impormante, naging susi sa operasyon
Ayon sa PDEA 7, nagsimula ang operasyon matapos makatanggap ng impormasyon mula sa isang confidential informant na nagbunsod sa isang linggong surveillance at case buildup laban sa mga suspek.
Lumabas sa imbestigasyon na kayang magbenta o maglabas ng naturang drug den ng tinatayang 50 gramo ng hinihinalang shabu kada linggo.
Batay rin sa rekord ng pulisya, dati nang naaresto ang isa sa mga kostumer na si alyas “Al” dahil sa mga kasong may kaugnayan sa ilegal na droga.
Una siyang dinakip ng Talisay City Police Station noong 2019 dahil sa ilegal na pag-iingat ng ipinagbabawal na gamot at muli noong 2021 dahil naman sa pagbebenta ng ilegal na droga.
Sa isinagawang operasyon, nakumpiska ng mga awtoridad ang pitong pakete ng hinihinalang shabu na may kabuuang timbang na 11.9 gramo at tinatayang street value na P80,920.
Nasamsam din ang isang bukas na plastic sachet at dalawang piraso ng aluminum foil na kapwa may bakas ng hinihinalang shabu, buy-bust money, iba’t ibang drug paraphernalia, at isang revolver na may limang bala.
Isinailalim na sa chemical analysis ng PDEA 7 Regional Office Laboratory ang mga nakumpiskang hinihinalang ilegal na droga.
Samantala, pansamantalang nakakulong ang limang suspek sa custodial facility ng PDEA 7 sa Barangay Lahug, Cebu City.
