NASABAT ng mga awtoridad ang dalawang Chinese national at dalawang Filipino boat captain na may dalang ₱6.2 bilyong halaga ng pinaghihinalaang shabu sa Paluan, Occidental Mindoro noong Marso 10.
Tinatayang humigit-kumulang 910 kilo na aabot sa 40 sako ng pinaghihinalaang methamphetamine hydrochloride o shabu ang naharang matapos sumadsad ang isang twin-engine speedboat sa Sitio Agbaritre, Barangay Harrison.
Agad na rumesponde ang mga opisyal ng barangay at mga sundalo mula sa 76th Infantry Battalion ng Philippine Army, kasunod ang mga operasyon ng pagtugis ng Philippine National Police (PNP), Philippine Coast Guard (PCG).
Arestado rin ang apat na suspek sa operasyon, kabilang ang dalawang Chinese national at dalawang Pilipinong Kapitan ng bangka habang tinutugis naman ng mga awtoridad ang isang babaeng Chinese national na pinaniniwalaang pinuno ng grupo habang isinasagawa ang financial tracking upang matukoy ang mas malawak na network sa likod ng tangkang pagpupuslit.
Kabilang sa mga narekober na kagamitan ang isang Starlink modem, mga satellite phone, hand flare, mga baterya, at safety gears.
Ang mga inisyal na marka sa mga sako ay nagmumungkahi na ang mga droga ay maaaring nagmula sa Vietnam, bagama’t bineberipika pa ng mga awtoridad.
Naniniwala ang mga imbestigador na ang mga droga ay inilipat mula sa mas malalaking barko sa mga internasyonal na katubigan patungo sa mas maliliit na speedboat na nagtangkang ilipat ang mga ilegal na kargamento patungo sa baybayin.
About the Author
