NAKATAKDANG maging state witness ang dating Kalihim ng Department of Public Works and Highways (DPWH) na si Manuel Bonoan sa patuloy na imbestigasyon ng gobyerno sa mga umano’y anomalya na kinasasangkutan ng mga proyekto sa flood control matapos pumayag na makipagtulungan ito sa Office of the Ombudsman.
Sinabi nitong Lunes ni Ombudsman Jesus Crispin Remulla na hihilingin ng kanyang opisina sa korte na alisin si Bonoan bilang respondent sa kaso upang payagan siyang magsilbing cooperating witness.
“Mayroon na kaming nilagdaang kasunduan para sa kooperasyon ni Bonoan na maging cooperating witness,” sabi ni Remulla.
Binigyang-diin ni Remulla na ang testimonya ni Bonoan ay inaasahang gaganap ng mahalagang papel sa imbestigasyon dahil sa kanyang direktang kaalaman sa pagpaplano, pagpapatupad ng mga proyekto sa flood control ng gobyerno.
“Ang kaalaman niya ay napakahalaga sa kasong ito,” dagdag niya.
Nakatuon ang imbestigasyon sa mga umano’y iregularidad sa ilang proyekto saflood control , kabilang ang mga reklamo ng substandard na imprastraktura, pagdoble ng mga proyekto, at ang umano’y maling paggamit ng pondo ng gobyerno.
Patuloy na nangangalap ng mga dokumentong ebidensya at testimonya ang mga awtoridad bilang bahagi ng kanilang case build-up.
Inihayag din ni Remulla na si Senador Joel Villanueva at walong kasalukuyang miyembro ng House of Representatives ay sasailalim sa isang paunang imbestigasyon kaugnay ng mga umano’y anomalya na kinasasangkutan ng mga proyekto sa flood control.
Ipinaliwanag niya na ang Tanggapan ng Ombudsman ay naglunsad ng sarili nitong imbestigasyon matapos matukoy na hindi sapat ang case build-up ng Department of Justice (DOJ).
“Hindi namin tinanggap ang mga natuklasan ng DOJ dahil nakita naming hindi sapat ang case build-up, kaya kinailangan naming magsagawa ng sarili naming imbestigasyon,” sabi ni Remulla.
Hindi isiniwalat ng Ombudsman ang pagkakakilanlan ng walong mambabatas o nagbigay ng karagdagang detalye tungkol sa mga reklamong sinuri.
Samantala, sinabi ni Remulla na ang Tanggapan ng Ombudsman ay naghahanda rin na magsampa ng kasong plunder na hindi maaaring piyansahan sa Sandiganbayan laban kay Senador Rodante Marcoleta sa mga darating na araw.
“Senador Marcoleta, kailangan na naming resolbahin ito. Malapit na namin itong ihain,” sabi ni Remulla.
Ang kaso ay naiulat na nagmula sa umano’y mga iregularidad na kinasasangkutan ng ₱75 milyon na mga donasyon sa kampanya na may kaugnayan kay Marcoleta.
Sa ngayon, hindi pa naglalabas ng mga opisyal na pahayag sina Bonoan, Villanueva, at Marcoleta tungkol sa mga anunsyong ginawa ni Remulla.
About the Author
