Mekeni Food Corporation President Prudencio “Prudz” Garcia
Batangas City — SA unang pagkakataon, nagbukas ng pinto ang Mekeni Food Corporation para sa isang media meet and greet na dinaluhan ng higit apatnapung journalists mula Batangas, Laguna, at Cavite. Ginawa ito sa pangunguna ng Mekeni Executives, kasama ang kanilang President na si Prudencio “Prudz” Garcia, na buong siglang tinanggap ang mga bisita.
Sa kanyang welcome remarks, ibinahagi ni Mr. Garcia ang pinagmulang kuwento at puso ng Mekeni Food Corporation. Ayon sa kanya, ang kompanya ay hindi itinayo para lang kumita, kundi para maging sandigan ng kanilang komunidad—lalo na noong panahon ng matinding sakuna. Matapos ang pagputok ng Mt. Pinatubo noong 1991, nakita ng pamilyang Garcia ang hirap ng kanilang mga kapitbahay sa Balubad, at dito nagsimula ang pagnanais nilang tumulong sa pamamagitan ng negosyo.
Pagsapit ng 1993, kahit nagtatrabaho na sa abroad ang limang magkakapatid, pinabalik sila ng kanilang ama, si Felix Garcia, upang pagtuunan ng pansin ang paglago ng Mekeni. Dahil sa panawagan ng kanilang ama, umuwi ang magkakapatid at nagtayo ng maliit na planta sa mismong bakuran nila—isang simpleng simula na nakapagbigay agad ng trabaho sa higit apatnapung kapitbahay.
Habang unti-unting lumalago ang negosyo, hinarap ng Mekeni ang isang mabigat na pagsubok noong 1996—ang foot-and-mouth disease outbreak. Umabot sa puntong halos mawalan ng pag-asa ang magkakapatid. Ngunit muli nilang binalikan ang dahilan ng kanilang pag-uwi at pagbuo ng negosyo: ang pagtulong sa komunidad. Inspirasyon sa kanila ang payo ng kanilang ama—na huwag sumuko dahil lang sa problema at alalahaning marami ang umaasa sa kanila.
Kinausap ng magkakapatid ang kanilang mga manggagawa, ipinaliwanag ang sitwasyon, at doon nila nakita na minsan, ang pinakamagagandang ideya ay hindi nanggagaling sa top management, kundi mula sa taong katabi mo araw-araw. Doon nila naunawaan na ang leadership ay hindi tungkol sa pagkakaroon ng lahat ng sagot, kundi sa pakikinig at pagdamay.
Ngayon, ang Mekeni Food Corporation ay may humigit-kumulang 1,600 employees at patuloy pang lumalawak—hindi lamang sa Pilipinas kundi pati sa international market. Mula sa isang backyard operation na may iilang empleyado, isa na itong global Filipino brand na nananatiling tapat sa kanyang core mission: komunidad muna, negosyo pangalawa.
Sa pagtatapos ng media meet and greet, malinaw sa lahat ng dumalo na ang kuwento ng Mekeni ay higit pa sa produkto; ito ay kuwento ng resiliency, malasakit, at leadership na nakaugat sa puso ng isang pamilyang ang tanging hangarin ay tumulong.
About the Author
