APRUBADO na sa ikalawang pagbasa ng House of Representatives nitong Lunes ang dalawang House Bills (HBs) na naglalayong magbigay ng karagdagang benepisyo para sa mga overseas Filipino workers (OFWs).
Ang HB 10959, na pangunahing inakda ni Deputy Speaker Aurelio “Dong” Gonzales Jr., ay naglalayong bigyan ng karapatan ang mga overseas Filipino workers (OFWs) ng 50% na diskwento sa mga bayarin o singil na ipinapataw sa mga remittance sa kanilang mga pamilya sa Pilipinas.
Ipinaliwanag ni House Committee on Overseas Workers Affairs chairperson at Tingog Partylist Rep. Jude Acidre, na nag-sponsor ng panukalang batas sa plenaryo, na ang panukala ay nagbibigay ng mga insentibo upang hikayatin ang mga remittance center na ibigay ang iminungkahing diskwento.
“Maaaring i-claim ng (mga center) ang mga diskuwento na ipinagkaloob bilang mga bawas sa buwis batay sa halaga ng mga serbisyong ibinigay sa mga OFW upang ituring bilang ordinaryo at kinakailangang gastos na mababawas mula sa kanilang kabuuang kita,” sabi ni Acidre.
Ang panukala, ay dapat kilalanin bilang “Overseas Filipino Workers (OFWs) Remittance Protection Act,” kung at kapag naisabatas bilang batas.
Ipinasa din ng Kamara sa ikalawang pagbasa ang HB 10914, na magbibigay karapatan sa mga OFW at kanilang pamilya ng libreng pinansyal na edukasyon.
Ayon kay Acidre, na isa sa mga may-akda ng HB 10914, ang panukalang batas sa sandaling maisabatas ay magpoprotekta sa mga migranteng manggagawa mula sa mga scam sa pamumuhunan, kasabay nito, ay magbibigay sa kanila ng tamang kaalaman upang makatipid ng kanilang pera sa pamamagitan ng nararapat na edukasyon at pagsasanay sa financial literacy.
Sa ilalim ng Bill, lahat ng OFW ay sasailalim sa mandatory financial literacy training seminars, na magiging mahalagang bahagi ng Pre-Departure Orientation Seminar (PDOS) ng mga papalabas na OFW, at Post Arrival Training Seminars (PATS) sa kanilang mga bansang destinasyon.
About the Author
