QUEZON CITY —TATLONG panukalang batas ang inihain ni Congressman Jesus Manuel “Bong” Suntay ng Ika-4 na Distrito ng Quezon City na naglalayon gawing mas ligtas ang mga kalsada, wakasan ang pang-aabuso sa trapiko, at tiyaking maayos at makatao ang disenyo ng mga gusaling pampubliko.
Aniya, “Lahat ito ay tugon sa mga araw-araw na suliranin ng ating mga kababayan—mula sa kawalan ng ligtas na daan para sa mga siklista, hanggang sa hindi patas na hulihan sa trapiko, at mga gusaling walang saysay ang disenyo. Dapat guminhawa at gumanda ang buhay ng bawat Pilipino,” .
1. Philippine Bicycle Act (House Bill No. 1631)
Layunin ng batas na ito na kilalanin ang bisikleta bilang seryosong paraan ng transportasyon, hindi lang libangan. Magtatayo ito ng mga ligtas at eksklusibong bike lanes, maglalagay ng mga bicycle parking sa mga paaralan, ospital, at opisina, at magtatatag ng Local Bicycle Office (LBO) sa bawat lungsod at bayan.
Laman ng panukala:
• Obligadong bike lanes sa mga pangunahing kalsada
• Bike parking sa mga pampublikong gusali at pribadong establisyemento
• Suporta sa mga empleyadong nagbibisikleta patungong trabaho
• Insentibo sa mga kumpanyang “bike-friendly”
• Pambansang data dashboard para sa biking programs
2. No Contact Traffic Apprehension Act (House Bill No. 1632)
Tinutuligsa ng batas na ito ang pisikal na hulihan sa trapiko at itinataguyod ang paggamit ng CCTV at digital systems upang mahuli ang mga paglabag—nang walang harapang enkuwentro. Layunin nitong iwasan ang kotong, masamang pakikitungo, at hindi patas na hulihan.
Nilalaman ng panukala:
• CCTV at digital tools na may malinaw na ebidensya
• Electronic na abiso para sa traffic violations
• May malinaw na proseso sa pag-apela o pagtutol
• Mga insentibo para sa mga maayos magmaneho
• May Traffic Adjudication Board sa mga lungsod at LGUs
“Hindi ito panibagong paraan para mangolekta ng multa—ito ay paraan para gawing patas at disente ang pagpapatupad ng batas trapiko,” giit ni Suntay.
3. Local Architecture and Design Governance Act (House Bill No. 1630)
Sa panukalang ito, obligado na ang bawat probinsya, lungsod, at munisipyo na magkaroon ng opisina ng arkitektura na pamumunuan ng isang rehistradong arkitekto. Layunin nitong tiyaking ligtas, maganda, at akma sa pangangailangan ng tao ang mga pampublikong gusali.
Mga pangunahing bahagi ng panukala:
• Paglikha ng Local Office of Architectural Planning and Design (LOAPD)
• Tiyak na partisipasyon ng arkitekto sa mga proyekto ng LGU
• Regular na architectural audits at design workshops kasama ang komunidad
• Paglalaan ng pondo para sa mga plano at pagsasanay sa arkitektura
• Pagsunod sa Accessibility Law at building safety standards
“Ang maayos na disenyo ay hindi karangyaan. Isa itong batayang pangangailangan para sa ligtas at maayos na pamumuhay,” sabi ni Suntay.
Ang tatlong panukalang batas na ito ay bahagi ng adbokasiya ni Cong. Bong Suntay para sa isang makatao, makatarungan, at maayos na pamayanan—hindi lang sa Quezon City kundi sa buong bansa.
About the Author
