May 22, 2024

The Insider News

Direct from the source

DA Calabarzon, nakaantabay sa presyo ng pampublikong pamilihan

Bilang panata na aktibong antabayanan ang lagay ng presyo ng mga produktong agrikultural sa merkado, isang pagpupulong ang inihanda ng Department of Agriculture IV-CALABARZON (DA-4A) Agribusiness and Marketing Assistance Division (AMAD) para sa Regional Bantay Presyo Monitoring Team (RBPMT) kasama ang mga lokal na pamahalaan noong ika-8 ng Nobyembre.

Ang RBPMT ang nagsasagawa ng regular na pangongolekta ng mga impormasyon ukol sa katayuan ng presyo ng mga bilihin sa mga pangunahing pampublikong pamilihan sa rehiyon. Nakikipagtulungan din sila sa mga lokal na pamahalaan upang isaalang-alang ang mga aksyon na nararapat gawin sa larangan ng pagbabantay-presyo.

Nilayon ng aktibidad na mai-presenta ang kasalukuyang kondisyon ng suplay at presyo ng mga piling commodity sa rehiyon, partikular ang bigas, mais, livestock, high value crops, isdaan, asukal, at pataba. Gayundin ang market profile ng mga iminungkahi na karagdagang pampublikong pamilihan na isasali sa regular monitoring ng Bantay Presyo Monitoring System (BPMS).

Ayon kay AMAD Chief Editha Salvosa na siyang nanguna sa pangangasiwa ng pagpupulong, dahil malaki ang kaakibat na tungkulin ng RBPMT at mga lokal na pamahalaan upang makatulong sa mga consumer pagdating sa pagkontrol ng presyo, mahalaga ang masigasig na pagdalo ng bawat miyembro nang sa gayon ay maihayag din ang iba pang isyu o problemang nakita sa merkado.

Samantala, tinalakay din sa aktibidad ang Proclamation No. 84 Series of 2022 kung saan nakapaloob na isa ang rehiyon ng Calabarzon sa mga idineklara ni Presidente Ferdinand Marcos Jr. na nasa “State of Calamity”. Itinatakda nito ang mas pinagtibay na pagkontrol ng presyo sa kabila ng pananalasa ng bagyong Paeng noong Oktubre.