NAKAKITA ang Commission on Audit (COA) ng ilang “unverifiable” o hindi mapatunayang benepisyaryo sa voucher program ng Department of Education (DepEd) para sa school year 2025-2026, na nagresulta sa “overpayment” na nagkakahalaga ng P938,000 sa government assistance.
Ayon sa COA, hindi nito makumpirma ang pagkakaroon o aktuwal na pag-aaral ng naturang mga benepisyaryo dahil ang ilan sa kanila ay huminto sa pag-aaral, lumipat ng paaralan, hindi nag-enroll sa ikalawang semestre, iniulat na namatay, o walang available na school records.
Batay ito sa isinagawang compliance audit ng COA sa mga benepisyaryo ng Voucher Program (VPBs) sa ilalim ng Government Assistance to Students and Teachers in Private Education (GASTPE) para sa mga senior high school students.
Inilabas ang audit report noong Setyembre 23.
Sa ilalim ng GASTPE, maaaring makatanggap ng educational assistance ang mga estudyanteng naka-enroll sa mga pribadong high school sa pamamagitan ng Private Education Student Financial Assistance Program voucher system.
Kabilang din sa iba pang anyo ng tulong ang tuition fee supplements, high school textbook fund, scholarship grants at education loan fund.
Ang halaga ng tulong ay nakabatay sa tuition fees, pangangailangang pinansyal at pangkalahatang performance ng paaralan, geographic spread at laki ng student population, academic qualifications at financial needs ng mga mag-aaral, pati na rin ang socioeconomic needs ng bawat rehiyon.
Ayon sa COA, may kabuuang 172,909 benepisyaryo sa buong bansa sa ilalim ng GASTPE voucher program para sa school year 2025-2026, hindi kabilang ang mga benepisyaryo mula sa Bangsamoro Autonomous Region in Muslim Mindanao (BARMM) at Negros Island Region (NIR).
Sa isinagawang validation, nagbigay ng halimbawa ang COA ng 5,507 benepisyaryo mula sa 571 senior high schools.
Sa bilang na ito, 995 ang mula sa National Capital Region (NCR), habang 4,512 naman ang mula sa iba pang rehiyon.
Sa 5,507 benepisyaryo, sinabi ng COA na 5,383 ang nakumpirmang umiiral at aktuwal na benepisyaryo, habang 58 ang hindi mapatunayan.
Sa 58 hindi mapatunayang benepisyaryo, sinabi ng COA na 32 ang opisyal o hindi opisyal na huminto sa pag-aaral, 12 ang lumipat sa ibang paaralan, 11 ang hindi nag-enroll sa ikalawang semestre, dalawa ang iniulat na namatay, at isa ang wala noong isinagawa ang school validation at walang available na records.
Napag-alaman din na naipalabas na ang mga bayad sa mga paaralan ng 53 sa 58 hindi mapatunayang benepisyaryo, na nagresulta sa P938,000 overpayment sa government assistance.
Binigyang-diin ng COA na sa ilalim ng Department Order No. 20, series of 2023, nawawalan ng karapatan sa subsidy ang isang estudyante kapag huminto ito sa pag-aaral sa loob ng school year.
Inaatasan din ng nasabing kautusan ang mga kalahok na paaralan na isauli sa DepEd ang anumang sobrang bayad kapag lumampas ang naibayad sa tamang halaga.
Saklaw nito ang mga hindi sinasadyang pagkakamali gayundin ang mga pagkakataong huminto o lumipat ng paaralan ang isang estudyante bago matapos ang unang semestre.
Ayon sa COA, responsibilidad ng mga kalahok na paaralan na regular na i-update ang status ng kanilang mga estudyante, habang nagsasagawa naman ang DepEd ng karagdagang validation upang maiwasan ang posibleng overpayment.
Bilang bahagi ng mga rekomendasyon nito, hinimok ng COA ang DepEd na beripikahin ang enrollment status at aktuwal na pagkakaroon ng mga hindi mapatunayang benepisyaryo at atasan ang lahat ng senior high schools na kalahok sa programa na tiyaking tama at kumpleto ang mga kinakailangang dokumento.
About the Author
