NASAWI ang isang lalaki habang ang kanyang kasama ay nasugatan sa pamamaril ng riding in tandem sa Purok 6, Bgy. San Josef Sur, Cabanatuan City noong Sabado.
Sa ulat kay Police Regional Office 3 director Brig. Gen. Jose Hidalgo Jr., tinukoy ng pulisya ng Cabanatuan ang biktimang si Julius Cruz de Guzman, ng Cecilia Village 1 Subdivision, Bgy D.S. Garcia, Cabanatuan City.
Ang sugatan ay nakilalang si Davidson Magdaraog, ng Bgy. San Josef Sur, Cabanatuan City.
Sa inisyal na imbestigasyon, bigla na lamang sumulpot ang mga suspek lulan ng isang itim na motorsiklo at walang habas na pinagbabaril ang mga biktima saka tumakas sa di malamang direksyon.
Mabilis naman dinala ang mga biktima sa Nueva Ecija Doctors’ Hospital, ngunit si de Guzman ay idineklarang dead on arrival.
Nagsasagawa naman ang pulisya ng “Oplan: Bakod” upang hulihin ang mga suspek.
