WALANG nilabag na batas si dating Pangulong Rodrigo Duterte sa paglipat ng bilyon-bilyong piso sa Procurement Service ng Department of Budget and Management (PS-DBM) para labanan ang Covid, ayon kay Sen. Robinhood “Robin” C. Padilla.
Ani Padilla, ito ay base sa Seksyon 4 ng Bayanihan Law 1 (RA 11469) na nagbubukod sa mga pagbili ng personal protective equipment (PPEs) mula sa procurement law at iba pang nauugnay na batas at alinsunod sa Government Procurement Policy Board Resolution na may petsang Abril 6, 2020.
Dagdag niya, binigyan ng emergency powers si Duterte noon para labanan ang pandemya at ang epekto nito.
“Si dating Pangulo Rodrigo Roa Duterte ay walang nilabag na batas at sa katotohanan batay po sa Seksyon 4 ng Bayanihan Law 1 (RA 11469) na nagbubukod sa mga pagbili ng personal protective equipment (PPEs) mula sa procurement law at iba pang nauugnay na batas at alinsunod sa Government Procurement Policy Board Resolution na may petsang Abril 6, 2020,” aniya.
Noong nakaraang linggo, ibinunyag ni dating Health Secretary Francisco Duque III sa congressional inquiry na pinalipat niya ang P47.6 bilyon sa PS-DBM para bumili ng Covid supplies, base sa utos ni noo’y Pangulong Duterte.
Iginiit ni Padilla na dapat ay walang batuhan ng putik sa isyu na ito dahil ang Pilipinas, tulad ng ibang pamahalaan noong panahong iyon, ay kailangang gumastos para talunin ang pandemya.
“Katulad ng ibang mga bansa tunay na sumuka ng salapi ang lahat ng gobyerno, ang karamihan ay katulad natin na nangutang para mapagtagumpayan ang pandemic ng COVID,” aniya.
“Kailangan ba talaga magbatuhan ng putik sa oras na ang Inangbayan ay nasa bingit ng tatahaking kapalaran?” dagdag niya.
