BIGO ang pulisya noong Biyernes na magsilbi ng warrant para sa pag-aresto sa Kapuso actor na si Ken Chan matapos itong hindi matagpuan sa kanyang tahanan sa Quezon City.
Si Chan, kasama ang pitong iba pa, ay nahaharap sa syndicated estafa charges dahil sa umano’y maanomalyang investment deal na nagkakahalaga ng P14 milyon para sa isang restaurant venture noong 2022.
Nabigo umano ang aktor na maihatid ang sharing deal, na nag-udyok sa reklamo.
Sa ilalim ng Article 315 ng Revised Penal Code, ang syndicated estafa ay non-bailable at may parusang habambuhay na pagkakakulong.
Kinatawan ni Attorney Joseph Noel Estrada at Attorney Maverick Romero ng Estrada & Aquino Law Office ang complainant, isang negosyanteng tumangging magpakilala.
Sinabi ng abogado na nakipagtransaksiyon ang complainant kay Chan at ibinigay ang P14 milyon sa dalawang tranches sa loob ng wala pang isang taon.
Nakumbinsi umano ni Chan ang complainant na mamuhunan sa isang restaurant business para makatanggap ng 10% monthly interest.
Idinagdag ni Estrada na si Chan at ang kanyang mga kapwa akusado ay hindi awtorisadong mag-solicit ng mga pamumuhunan.
“Using misrepresentation and fraudulent escapes, nakakuha sila ng pera dito sa complainant,” sabi pa ng abogado.
Noong 2023 nagsampa ng reklamo ang nagrereklamo laban kay Chan, sabi pa ng abogado.
Unang tinangka ng mga pulis na isilbi si Chan ng warrant of arrest noong Setyembre. No-show din ang aktor noon.
About the Author
