APRUBADO na ng Department of Agriculture ang guidelines para sa pag-aangkat ng 25,000 metric tons ng iba’t ibang isda at seafood simula Marso.
Sakop ng import ceiling ang 25,000-metric-toneladang Alaskan pollock, barramundi, blue fin tuna, capelin, Chilean seabass, clams, cobia, cod, croaker, eel, emperor, fish meat, flounder, gindara, grouper, hake, halibut, hamachi, hoki, lobster, mullet, mossel, mullet oyster, pangasius, red snapper, salmon, sardinas, scallops, sea bream, silverfish, smelt, soft at hardshell crab, pusit, swordfish, tuna by-products, at yellowtail sole.
Sa ilalim ng inaprubahang guidelines, maglalabas ang Bureau of Fisheries and Aquatic Resources (BFAR) ng sanitary at phytosanitary import clearances na may 45-araw na validity. Tanging BFAR-accredited cold storage facility ang papayagang mag-imbak ng imported na seafood.
Ang mga importer na gustong lumahok ay dapat na may accreditation nang hindi bababa sa isang taon at dating nakikibahagi sa mga katulad na pag-import. Ang hindi kumpleto o walang accreditation ng Bureau of Customs sa simula ng panahon ng pag-aangkat ay hindi isasali.
Ayon kay Agriculture Secretary Francisco P. Tiu Laurel Jr. ang panukalang ito ay naglalayong tiyakin ang matatag na suplay ng pagkain at maiwasan ang pagtaas ng presyo sa merkado.
Aniya, “Magdaragdag din ito ng sari-saring uri sa merkado, lalo na para sa industriya ng serbisyo ng pagkain, dahil ang mga isda at marine species na sakop ng importasyon na ito ay karamihan sa mga isda at produktong dagat na hindi nahuhuli sa lokal” .
“Hindi ito dapat makaapekto sa mga lokal na mangingisda at dapat makatulong sa kadalian ng paggawa ng negosyo,” dagdag pa niya.
Itinakda ng National Fisheries and Aquatic Resources Management Council (NFARMC) ang import ceiling na ito noong huling bahagi ng nakaraang taon, upang malaman kung paaano matugunan ang mga problema sa inflation at pagbutihin ang paglalaan ng dami ng import para sa mga institutional na mamimili at wet market.
About the Author
