BINIGYANG-diin ni Gobernadora Sol Aragones ang kahalagahan ng pang-industriyang agrikultura sa pagpapalago ng ekonomiya ng Lalawigan ng Laguna, dahil sa kakayahan nitong lumikha ng trabaho, suportahan ang mga magsasaka, at pag-ugnayin ang sektor ng agrikultura at industriya para sa pangmatagalang pag-unlad.
“Ang pang-industriyang agrikultura ang pangunahing industriya sa Laguna. Namamayagpag ang Ika-4 na Distrito sa produksyon ng agrikultura, habang ang Ika-2 Distrito naman ay nangunguna sa industriyalisasyon. Kapag pinagsama, nakabubuo ito ng matibay na ugnayan na nagtutulak sa inklusibong pag-unlad,” pahayag ni Gobernadora Aragones sa isang panayam sa DZMM Teleradyo.
Tinukoy niya ang masaganang likas na yaman ng Laguna, niyog mula sa San Pablo, samu’t saring gulay, lansones, at rambutan bilang mga produktong may mataas na potensyal na maiproseso at maiangat sa pamamagitan ng mas pinatibay na integrasyon ng agrikultura at industriya.
“Ang pagtatanim at pagbebenta ng gulay ay isang napakagandang negosyo sa Laguna. Itinutulak namin ang mga sistemang mag-uugnay sa ating mga magsasaka sa matatag na supply chain upang magkaroon sila ng mas tiyak na kita at pagkakataon sa pag-unlad,” dagdag pa niya.
Binigyang-diin din ni Gobernadora Aragones ang suporta ng pamahalaang panlalawigan sa maliliit na manininda at mga micro-entrepreneur. “Tuwing flag ceremony, sinisikap naming tangkilikin ang mga lokal na nagtitinda ng kakanin at iba pang pagkaing produkto, dahil ito ay isang paraan upang sila ay kumita at maitaguyod ang kanilang kabuhayan,” aniya.
Dahil sa pagkakaroon ng mga lugar para sa industriya at buong suporta ng Sangguniang Panlalawigan pati na rin ng kanyang mga kasamang lingkod-bayan, nakikita ni Gobernadora Aragones ang Laguna bilang isang huwarang lalawigan pagdating sa industrialisado at inklusibong agrikultura.
About the Author
