LUSOT na sa Committtee on Children Welfare ng kamara ang pagpapataw sa mas mabigat na parusang pagkakulong sa mga “deadbeat father” o magulang na tatay na ayaw sustentuhan ang kanilang mga anak .
Nagpapaslamat si House Deputy Majority Leader at ACT-CIS partylist Rep. Erwin Tulfo kung saan nasa Committee on Appropriations na ang House Bill 8987 o ang “An Act Ensuring Child Support and Penalizing Parental Refusal or Neglect Thereof” para pag-aralan kung magkano ang kakailanganing pondo para makapagtatag ng isang opisina sa DSWD na mangangasiwa sa implementasyon ng batas.
“Kailangang kailangan na natin itong batas na ito. Kailangang maparusahan ang mga tatay na ayaw bigyan ng suporta ang kanilang mga anak, lalo na kapag iniwan na nya ang kanyang pamilya”, ayon sa pahayag ni Tulfo.
“Nagpapasalamat tayo sa ating mga kasamahan sa Kongreso sa pag-usad nitong panukalang batas, pero sana ay mas madaliin pa ito para tuluyan nang mapanagot ang mga walang pusong ama na tinalikuran ang kanilang mga sariling anak,” giit ni Tulfo.
Ang naturang panukalang batas ay inihain ni Tulfo noong Agosto 2023, katuwang ang kanyang mga kasamahan sa ACT-CIS partylist na sina Reps. Jocelyn Tulfo, at Edvic Yap; Benguet Cong. Eric Yap at Quezon City 2nd District Rep. Ralph Tulfo.
Panukala ng mga mambabatas ang hanggang anim na taong pagkakulong sa mga “deadbeat” father na ayaw panagutan ang kanilang mga anak.
Napagkasunduan naman sa mga pagdinig na ang ibibigay na suporta ng tatay sa kanilang anak ay depende sa pangangailangan ng bata. Aatasan ng batas na ang DSWD, sa pakikipagtulungan ng NEDA, ang siyang magtatakda kung magkano ang ibibigay na suporta ng ‘deadbeat’ father sa kanilang anak.
“This bill will help our sole parents, numbering around 15 million of our population; it will be their tool to be able to support their children. Hindi na po kailangan lumuhod at magmakaawa ng mga ina sa mga ex nila at ama ng mga bata para sa sustento,” giit ni Tulfo habang dinidinig kamakailan ang panukalang batas sa Kongreso.
“Enough is enough, I would say. This has to end right now, kaya kailangan pong ipasa ang batas na ito. What is really unfortunate is that some of these irresponsible fathers are holding government positions while most are working in the private sector,” dagdag ni Tulfo.
Ang iba pang author ng naturang bill ay sina Reps. Paul Ruiz Daza, Patrick Michael Vargas, Paolo Z. Duterte, Gus Tambunting, Ma. Victoria Co-Pilar, Jude Acidre, Jurdin Jesus Romualdo, Baio Dimple Mastura, Ma. Rene Ann Lourdes Matibag, the late Edward Hagedorn, Noel Rivera, Wilbert Lee, at Angelica Natasha Co.
About the Author
