LUMAHOK ang 62 katutubo mula sa lalawigan ng Rizal at Quezon sa kauna-unahang Regional Indigenous Peoples (IP) Summit na pinangunahan ng Department of Agriculture IV-CALABARZON (DA-4A) Kabuhayan at Kaunlaran ng Kababayang Katutubo (4K) Program noong ika-18 hanggang ika- 20 ng Nobyembre sa Lucena City, Quezon.
Sa temang “Lakas at Kaunlaran ng Katutubo: Pagsulong ng Kabuhayan sa Agrikultura sa Bisa ng Pagkakaisa at Suporta,” layon ng pagtitipon na palakasin ang pagkakakilanlan at partisipasyon ng mga katutubo ng rehiyon sa sektor ng agrikultura.
Tinalakay sa summit ang mas maayos na pamamahala ng lupang ninuno, pagpapatatag ng boses ng IP sa lokal na pamahalaan, at pagtataguyod ng pangmatagalang kaunlaran sa larangan ng negosyo, pangangalaga sa kalikasan, at mga programang panlipunan.
Hiniling ni Hon. Thelma Aumentado, Provincial Indigenous Peoples Mandatory Representative ng Quezon, na umabot sa mga pangunahing ahensya ng pamahalaan ang pagpapahalagang ipinakita sa pagtitipong ito upang mas matulungan ang mga katutubo. Dagdag naman ni Gilbert Lopez, isang kabataang katutubo mula sa Rizal, na malaking inspirasyon para sa kanila ang pagkilala at suporta na natanggap nila, at ito raw ay nagbubukas ng pag-asa para sa mga kabataang IP na mas mapalakas ang kanilang boses at kultura.
About the Author
