ASSISTANT chief of staff ng Office of the Vice President (OVP) na si Lemuel Ortonio at tatlong kasalukuyan at dating opisyal ng Armed Forces of the Philippines (AFP) ang susunod na haharap sa impeachment court kaugnay ng umano’y maling paggamit ng confidential funds ni Vice President Sara Duterte.
Nakatakdang tumestigo si Ortonio bilang hostile witness ngayong Martes, habang haharap naman simula Miyerkules sina Col. Manaros Boransing II, Col. Magtangol Panopio at Maj. Gen. Adonis R. Bajao.
Subpoena ang tatlong opisyal upang linawin ang paggamit sa P112.5 milyon na confidential funds ng Department of Education (DepEd) noong 2023, nang si Duterte ang kalihim ng ahensya.
Ayon kay Manila Rep. Joel Chua, naglabas na ng certifications ang tatlong opisyal na nagsasabing wala silang natanggap na kahit isang sentimo mula sa naturang pondo.
Aniya, mahalaga ang kanilang testimonya sa pagbuo ng pattern na maaaring magpatibay sa alegasyon ng impeachable offense laban sa bise presidente.
Ang P112.5 milyon ay inilabas sa tatlong tranche na tig-P37.5 milyon habang sabay na nagsisilbi si Duterte bilang education secretary.
Samantala, inaasahang magbibigay si Ortonio ng karagdagang impormasyon hinggil sa P500 milyong confidential funds ng OVP na inilabas mula Disyembre 2022 hanggang ikatlong quarter ng 2023.
Nabanggit na ang pangalan ni Ortonio sa testimonya ng mga opisyal ng LandBank na tumunton sa pag-withdraw ng OVP confidential funds, kabilang ang unang P125 milyon na inilabas noong Disyembre 2022.
Nauna nang sinabi ng dating OVP special disbursing officer na si Gina Acosta na ang naturang pera ay ini-turn over kay Col. Raymund Dante Lachica sa utos umano ni Duterte. Sinabi rin niyang ganoon din ang naging proseso sa tatlo pang P125-milyong release noong 2023.
Ayon kay House prosecution legal spokesperson at counsel Benjamin “Jay” Tolosa Jr., lumilitaw din sa mga dokumentong isinumite sa impeachment court na may naging papel si Ortonio sa mga tugon ng OVP sa mga Audit Observation Memoranda (AOM) ng Commission on Audit (COA).
Samantala, binago ng prosecution panel ang witness lineup matapos maging pansamantalang unavailable ang dating DepEd special disbursing officer na si Edward Fajarda, na dapat sanang sumunod kay Acosta matapos umano itong ma-stroke.
Dahil dito, iniharap muna si Ortonio at hiniling ng prosecution ang pagpapalabas ng subpoena para sa tatlong AFP officers.
Nagpahayag naman ng pagtutol ang kampo ni Duterte sa maikling abiso, dahil sa limang-araw na disclosure rule ng impeachment court at pangangailangan ng depensa na makapaghanda para sa cross-examination.
Pinayagan ni Senate impeachment court Presiding Officer Sen. Francis “Chiz” Escudero ang mga subpoena ngunit tiniyak na bibigyan ng sapat na panahon ang depensa para maghanda.
Inatasang humarap ang tatlong opisyal ng militar simula Miyerkules, at maaari pa silang ipatawag sa Setyembre 1 at 2 kung kinakailangan.
Nananatili naman sa witness lineup si Fajarda, na posibleng tumestigo sa Setyembre 7, depende sa kanyang kondisyon at assessment ng Senate Medical and Dental Bureau.
Inaasahang magbibigay ang mga susunod na testimonya ng dagdag na detalye sa dalawang pinag-uusapang pondo—ang P500 milyon sa OVP at P112.5 milyon sa DepEd—na kapwa iniuugnay ng prosecution sa alegasyon ng maling paggamit ng confidential funds.
About the Author
