KARAGDAGANG piso (P1.00) ang pamasahe sa mga pampublikong dyip sa buong bansa simula sa darating na Linggo, ika-08 ng Oktubre 2023.
Kasunod ito ng pag-apruba ng Land Transportation Franchising and Regulatory Board (LTFRB) sa inihaing petisyon ng ilang transport group na dagdagan ang pamasahe sa mga pampublikong dyip bunsod ng walang prenong taas-presyo ng mga produktong petrolyo.
Base sa LTFRB , dininig ngayong hapon ng ahensya ang petisyon na dagdagan ang pamasahe sa mga Modern Public Utility Jeepney (MPUJ) at Traditional Public Utility Jeepney (TPUJ) na inihain ng Pangkalahatang Sanggunian Manila & Suburbs Drivers Association Nationwide, Inc. (PASANG MASDA), Alliance of Transport Operators and Drivers Association of the Philippines (ALTODAP), at Alliance of Concerned Transport Organization (ACTO).
Kabilang dito ang hirit ng mga naturang grupo na limang pisong (P5.00) taas-pasahe sa unang apat (4) na kilometro at piso (P1.00) para sa mga susunod na kilometro.
Gayunman, sa nasabing pagdinig, tanging ang petisyon na pisong (P1.00) pansamantalang taas-pasahe o provisional fare increase lamang ang inaprubahan ng LTFRB bilang kapwa tugon sa hiling ng mga transport group at hinaing ng mga komyuter.
Ayon pa sa LTFRB Board napagdesisyunan na simula sa Linggo, magkakaroon ng karagdagang piso (P1.00) ang minimum fare sa mga TPUJ na magiging labing-tatlong piso (13.00) habang aakyat naman sa labing-limang piso (P15.00) ang pamasahe sa mga MPUJ sa buong bansa.
“Piso na provisional fare increase lamang po ang inaprubahan natin sa first four kilometres pero wala pong kahit anong dagdag sa succeeding kilometres. Applicable po ito sa modern at traditional public utility jeepney sa buong bansa simula sa October 08,” paglilinaw ni LTFRB chairman Atty. Teofilo Guadiz .
Pinapaalala din aniya sa lahat ng mga operator, tsuper, at komyuter na kinakailangang ipatupad ang nasabing taas-pasahe sa nakatakdang petsa habang dinidinig ng ahensya ang pangunahing petisyon ng mga nasabing transport group.
Bukod dito, pinaalala rin ng LTFRB sa mga operator at tsuper na ibigay ang mga diskwento para sa senior citizens, persons with disabilities (PWDs), estudyante, at iba pa.
About the Author
