NAHALAL bilang bagong santo papa si Cardinal Robert Francis Prevost ng Estados Unidos na tinawag sa pangalang Leo XIV.
Si Pope Leo XIV, ang unang American pontiff sa kasaysayan, ang magiging ika-267 na pinuno ng Simbahang Katoliko.
Maglilingkod siya sa 1.4 bilyong Katoliko sa buong mundo.
Sa kanyang unang pananalita bilang papa mula sa balkonahe ng St. Peter’s Basilica, nanawagan siya ng kapayapaan at nagbigay pugay sa yumaong Pope Francis.
Si Pope Francis na kilala bilang “The People’s Pope” ay namatay noong Abril 21, 2025.
Ang 69-taong-gulang na bagong papa mula sa Chicago, ay isang lider na may pandaigdigang karanasan. Ginugol niya ang karamihan sa kanyang karera bilang misyonero sa South America at naglingkod bilang bishop sa Peru.
Inaasahang bubuo si Pope Leo XIV sa mga reporma ni Pope Francis.
Nitong Huwebes, ang pansamantalang tsimenea sa ibabaw ng Sistine Chapel ay naglabas ng maputing usok, na hudyat na ang 133 kardinal ay umabot sa 2/3 boto ng mayorya upang maghalal ng bagong papa.
Ang mga kampana ng simbahan ay tumunog at naghiyawan ang libu-libong tao sa St. Peter’s Square habang umaalingawngaw ang puting usok mula sa tsimenea.
Ang bagong papa ay napili pagkatapos ng dalawang araw ng conclave voting.
