NAGLABAS ng show cause order (SCO) ang Land Transportation Office (LTO) laban sa rehistradong may-ari at driver ng trailer truck na nagsimula ng multiple vehicular accident na ikinasawi ng tatlong katao sa Marikina City noong Miyerkules ng gabi, Abril 23.
Sinabi ni LTO Chief, Assistant Secretary Atty. Vigor D. Mendoza II na ang pagpapalabas ng SCO ay para sa inisyal na imbestigasyon, upang magpaliwanag ang may-ari at ang driver sa kanilang panig hinggil sa nangyaring aksidente.
“Gusto naming malaman kung ano talaga ang nangyari, at bahagi nito ay upang matukoy kung may mga lapses sa bahagi ng rehistradong may-ari sa mga tuntunin ng pagpapanatili ng trak at ang kondisyon ng driver sa oras ng aksidente,” sabi ni Asec Mendoza.
Batay sa ulat ng pulisya, lulan ang trak ng isang 40-foot container van at binabaybay ang Fortune Avenue sa Marikina City dakong alas-10 ng gab noong Miyerkules nang biglang huminto ang sasakyan at nagsimulang umatras habang bumibiyahe sa pataas na bahagi ng kalsada kung saan nawalan ng preno ang trak.
Hindi bababa sa tatlong tao ang namatay, isang jeepney driver at dalawang tao mula sa isang sedan, habang 10 iba pa ang nasugatan.
Nasa kustodiya na ngayon ng pulisya ang driver ng trak.
Sinabi ni Asec Mendoza na hihilingin sa driver ng trak na ipaliwanag kung bakit hindi siya dapat parusahan sa walang habas na pagmamaneho at hindi tamang pagpapatakbo ng sasakyan—ang parusa ay pagbawi ng lisensya.
Titingnan din ng mga imbestigador ng LTO ang posibleng overloading.
Suspendido na ang driver’s license ng driver ng truck habang isinailalim sa alarma ang trak.
